MINO LE ZIAZA MAWI

Mitampi cun Mino timi hi fala le tlangval lawngdingah kan ruat. Mino timi cu a tlangpi thu in kan sim a si le Kum 15-40 karlak hi a si tlangpi. Mino timi ziangtluk in kan thupi, ziangtluk in hmual kan nei ih kan tangkai timi cu Leitlun Ram tha le Ram cangkang pawl kan zoh tik ah kan hmuthei. An Mino pawl an cakvak ruangah an rak a thangso hi a rak si. Curuangah Phun le Hnam, Khawtlang, Kawhhran thangsonak ding hrangih a thupi bik tuanvo nei tu cu tuini ih kan ni mino pawl kan si. Leitlun santiluan cun in cimih cuisantiluan ih in fennak ah mitampi cu kan Nunphung le kan Sakhuanak khal thei aw nawn lo in kan um theu. Santiluan ih in cim tik ah kan mah lam khal ah kilhim awk kan thiam ahcun a rahsuak tampi kan hmu thei. Cutin kan ti tikah santiluan vek ih um lo ding tinak lam si lo in a tha zawngih hmangthiam tu le a hlawkzawngih hmangthiamtu kan si ding a thupi. Thahthiamnak ah Tui kan san hi IT san a si vek in Mino hmuahhmuah cun cui IT san cu kan dawi. Kan theih awl bik ding mi cu a tu ih kan theih larzet mi FACEBOOK hi a hmangthiam tui hrang ahcun tha hnemnak le Hlawknak, theihkauhnak mi a pe. Thenhrek khat cun mibumnak le mihuat relnak, thilruknak ect… ah an hmang. Cuvek ih an um tikah an caan hmuahhmuah cu a lak in an cem ih cutin siatralnak ah mi a thlen. Mino ih mawinak hi ziangmi a si? Mino ih mawinak cu kan ziaza tha langter hi a si. Ziaza tha timi cu kan nitin tlanlennak ih Nun tu khawsaknak, Hoi her daan pawl a si. Cumipawl cu 1. Pathian tihzah thiam, 2. Nu le Pa thihzah thiam 3. Mi lainat thiam, 4. Zawnruah thiam, 5. Zalen zet ih mikom thiam, 6. Mi upat thiam, 7. Tlawmngainak nunneih, 8. Caan hmanthiam hipawl hi a tlangpi thu in a khaikhawmtu bik an si. Mitampi cun kan No lai caan hi nuamnak lawnglawng in kan hmang ih kan nun zalam tluanah a tlangpi thu in harsatnak le mangbang vangsangnak lawng mi a phurh. Curuangah kan No lai caan ahhin tik cu caan hmangthiamtu kan si ding khal a thupi zet. Mipakhat cu ziangtluk ih Cathiam, Ziangtluk ih mifim a si hmanah a ziaza a mawi lo ahcun miupat le mi zahkai a hlawhthei lo tlunah ziangkim a sim a rel tiangin mi in an zum thei nawn lo. Mino pawl ih kan tahfungpi bik cu kan nitin tlanlennak ih ziaza hi a si. Mithenkhat cu Fimzirnak lam ah kan fehthei lo ih rual kom ding le tlanlenvah ding tiang in kan hreh. Simzo vek in Mifim, thiam sang kan si hmanah kan ziaza a that lo ahcun midang nunnak ah hmual a nei thei cuang lo. Curuangah Mino le ziaza timi cu ziangtik hmanah then aw thei an si lo. Ziaza tha ih rahsuak mi cun Ram le Miphun, kan Sakhuanak, kan kawhtlang le kan kawhhran tiang in a zar a rak to. Kawhhran, Khawtlang thangso ding cun Mino kan cak a tul. Mino kan cak ding cun a hmaisabik ah kan ziaza kan tuahthatawk a tul. Cumi lawngah kan ziaza cun kan kawhhran, kan khawtlang ah thangsonak a um thei ding. Curuangah kan khawhhran, kan khawtlang that so nak ding le mi kan bang theinak ding hrang tuanvo nei tu cu tuini ih kan ni mino pawl hi kan si. Kan Ram, kan miphun, kan nunphung, kan Khawtlang, kan Khawhhran le kan Sakhuanak upat a hlawh ih mi zahkai a si theinak ding hrangih a thupi bik cu tuni ih Mino nang le Kei kan nitin nunak ih kan langter mi ziaza mawi hi a si. Tuini ih kan ziaza tha lo mi hlawn ih ziaza mawi kan nei lawngah kan ram a dam dingih Cutin kan biak Cunghlum Pathian hminkhal a sunglawi sin dingih, a lungawi tertu miphun kan si tlunah a thlasuah mi Ram le Miphun kan si thei ding.