Bezai timi hi

Thuanthu Thlirsalnak

Kan chinmi kan thuanthua kan thlir a sile kan pupa san ihsin hla duh zet mi kan rak si cia. Ziangah tile kan pupa sanlai kan zoh tik ah conlamnak ah si maw, lungawinak ah si maw, riahsiat caanah hla thawn an rak awi aw theu. Ziangruangah hi law mam in an rak uar ti’n thusuhnak a um thei! Uar lo thei kan silo. Aruangah cu kan hla sungah tong al, tong thlum, tong mawi, tong tha le tong sailungvar tampi phorhsuak ding a um eueu. Hmanseh kan pupa san ahcun casungih zianghman ngan khum a um lo tik ah cupawl cu kan ni nonawn in kan hmuban nawn lo. Thucing thei hrekkhat lawng in ziangvek hla an raksak theu ti kan thei ding.

Asile kan pupa hlapawl cu ziangpawl an si? A tlangpi thu in hmunthum in kan thlir ding. Phaileng hla: Hih hla ahhin phuntampi a um nan a sak daan a silo le a merhkawi daan cu a dang cuang lo. Cupawl cu zuunngaih, cohram, cotian, runthawn, ramtuan ngai, ramtuan tian, sathawl ngai, ramtoih hla, hramnak, hlemnak, porhnak adt…. Tipawl hi an si. Hla dangdang: Fangza aih hla, fangza hlate, ceretlawh hla, sethlang hla, khuang hla, khuang hlate, khuate hla le nau hla pawl tla an si. Cun Mitthi hla: ngaihsan, liandang, Lalvung, Darluan, Eepi le Bawivung tla an si. Atlun ih kan simawk mipawl kan zoh tik ah kan pupa pawl hin Hla/zai timi hi an rak uar rori ti cu kan fiang cio ding a zum um.

Bezai (Poetry)

Bezai timi tongfang hi kan Calai  le kan miphun ih hnuk bul le hrampi a si. Curuangah kan calai muril le kan tong muril cu kan bezai sungah a um. Kan Calai le kan miphun thangso ding cun kan bezai hi kan kilkhawi thiam le tuamhlawm thiam kan tul hmasa. Bezai sungah hin hla thu, hla tongfang kan timipawl a um. “Bezai” timi hi be le zai kom ih ra cop mi a si. “Be” ih sullam cu bia ihsi rami a siih thu tinak a si. Zai timi ih sullam cu zai ti can a si. A pahnih kom ih sullam kan thlir a sile thu kha hla ih sak suak ti can a si.