DEMOCRACY PANGPAR HMUAN LAM PAN IN!

 Kan Chinmi dinhmun zoh rero tik ah harsatnak ruangah kan ti ding maw, Pathian zangfahnak in si maw mai sungkua hman um tlang khawm thiam lo in ram dangdang ah kan thek darh aw. Pathian lairel si maw, Harsatnak si maw ziangvek dinhmun a va si hmanah mipi pawl ih kan theih mi cu kan ram a harsat ruangah a si timi cu zo cio khal ih kan lungput a si.

Chinmi pawl cu Pangpar human sungih feh le vah kan duh nan, cui kan vah/fehnak ding hrang Pangpar hmuam tuah cu kan paih lo. Mi tuah cia le mi ih thisen le thlanhri put ih an tuah mi sungah hnaset tun ih veivah lawng kan thiam. Ruah rero tik ah ningzak ih relh rero ding kan si ko e!

November thlathar ah Rampi hrilawknak cu a ra thleng thlang ding. Mipi in ziangvek in timlamnak kan nei? Maw! Ziang khal ruat cuca lo in kan rak um men sawn? Mi in Democracy an sal rero ih, Democracy timi Pangpar hmuansung kan feh theinak dingah a hmaisabik kan lamzin karbak ziang a si pei ti teh a rak ruat kan um na hen maw? Party tam sawn cun an Party hminah Democracy timi pu ter an tam sawn si, cuvek dinhmun ah teh ziangvek in vote pek kan tum? 

Inn sang nu pakhat cun thlirri man kaizia le inn sungsang sumpai a harsat zia cu inn tek pa hnak in a thei nan a letnak ahcun phun ciar lawngin net a khor theu. Ziangruangah thil man a kai? Timi hliakhlaitu teh kan um maw? Inn sungsangih aukionak men in Democracy Pangpar hmuan kan thleng taktak thei pei maw? Democracy lamzin fehnak ding hrang ahcun mipakhat ih kan neih cio mi vote hi a thupi in a sunglawi hleice tuk.

Democracy Pangpar hmun nuam kan thlen theinak ding ahcun vote kan pek mi Party palai zo a si? Ram le miphun veitu taktak a si pei maw? A mai tanghma hai tu men saw a si ke? Hluatdaw ih an palai to tu ding kan theih fel lawngah kan ram le kan miphun kan thangso ding ti kan theih a tul!Party pakhat ih hluatdaw palai fumfe na theih lo ih, ol samten vote na pek a si ahcun Kum 4 sung maw harsa na tuar ding, kum ziat tiang timi kan theih a tul.

Curuangah hrilawknak hrang vote pe thei tu ding hmin list pawl an tarlang khal ah va zoh tento aw. Na tel lo a si le zamrang thei bik in tuanvoneitu pawl hnenah sim aw la tawlrel cih aw. Na vote pakhat cun na rampi, na miphun le na innsang tiang a mawi ter thei. A liam cia mi can pawl ah thinlung rak pe lo kan um pang khal a si le tusin tal in rampi rem mawinak ding kan thlir cio pei uh. Cu tin na tuah a si le Democracy Pangpar hmuan nuam ah lungawi ai puang in na ram, na miphun le na inn sungsang pawl cu nuam zet in kan lengtlang thei ding.