COLLEGE TAPUNG!
Khuahlan kan
Pupa san lai ahcun fimthiamnak cu tluk in santiluan in a rak pe lo tik ah,
Santhar nonawn ih kan Degree aiah Salu tar tamtam an rak zuam aw. Cutin an
Degree tampi an tar theinak dingah mai hmanngaih ding meithal khal mah fek rak
neih cio a si. Cuvek thotho in Salu tar tampawl cu mikip le khawtlang ih
ngaisan an hlawh. Culawng hman si lo Sapi Lu tar tam le Salu tar tam theithei
cu an khawlak lennak khal ah mithmai hngal in an um thei. Ngaihsangawk lo theih
lo tluk a si. Ziangah tile Salu tampi tar thei dingin Tlangpar hmunhla pipi ah
feh in le Sabawh in Thengh par ah Sabawh in zar an var. Rualpi nei lo hman in
Salu tampi an tar duh ruangah an mah te rori kiltu nei sihti bawh in an um. An
zuamnak sulhnu pawl zoh sal tik ah upat tlak le sunloihtlak rori an si.
Kum zabil 21st
kan thleng tik ahcun santiluan in kan mino pawl le kan mifim cathiam pawl cu in
run fen ih, cuisung ihsin kan suah thei lo tlunah cui in fentu santiluan cu
uahawknak ah kan hmang. Atlun ih kan simawk mi ah kan Pupa pawl cu ziangtluk in
an Degree hrangah an zuam timi cu kan hmu theih theh ding a zum um. Tulai kan
Santhar mino Tlawngta pawl dinhmun thawn kan zuam dan a bang aw thei maw ti hi
coitah thiam kan tul.
College Tlawng
kan kai timi hi ziangtluk in ngai san a um ih, ziangtluk in a phur a rit timi
tui tlawngta pawl in the kan ruat dah pei maw? University kan hung kai cin cun
kan exam mi pass nak hrang lawng siloin a lenglam ih thil tampi kan theih a
tul. Kan rampi a thanso ding le a tumsuk ding khal tuini ih tlawngkaitu pawl
kan liangah a thum aw. Tlawngta pawl kan cak ih, miphun kan vei lawngah kan miphun
le kan ram a thang so thei ding.
Kan mah le kan
dinhmun cu a tlunih kan ngan mipawl ah kan fiang aw theh ding a zum um. Tlawng
kan kainak ah zinagvek kan kai, nuamnak mennak kan hmang maw? Rualpi ngahnak
men ah maw kan hmang? Fala & Tlangval tonawknak men ah maw kan hmang? Ruah
ding tampi a um! Ahleice ih kan check awk tul mipakhat cu Tlawng kan theh ih
Degree kan ngah tik ah kan mah ten tohdelh aw thei tu kan si taktak pei maw?
Mahte hmakhua sial ih, nuntukhawsaknak thok dingah kan timlam tawk maw? Kan nu
le pai sumpai hman in kan feh vivo hrih ding?
A thupi zet mi
pakhat cu kan ram dinhmun a that lo ruangah siseh, cun kan Nu le Pa pawl
santiluan in a tan ruangah tla si thei. Mai fimzirnak lamzin kan fehnak cio ah
kan paih taktak mi le kan talent mi lamzin kan hril taktak maw? Kan nu le pa
pawl ih in fial hrat ruangih zir fang sawn kan si. Tlawngta pawl in kan zir
paih lo mi le kan zir khal ah kan thiam thei lo ding timi kan fiang ahcun nu le
pa pawl khal huaizet ih kan sim ngan a tul sal. Culawngah kan talent zawngah
kan feh ngah dingih nuntu khawsaknak hrang in bawm thei tu fimthiamnak khal kan
zir suak aw ngah ding.
Tui kan dinhmun
Kalay University kan zoh tik ah tlawngta kan tam zet ih, minung kan tam tuk tik
ah tlawngkai le kai lo khal zirh tu pawl in mi an hminsin thei cok lo. Cutikah
tlawngta then 3 then 1 tluk cu Lungpi li le dawr ah kan can kan hmang liam men.
A va ui um tak em!
Kan pupa pawl cu
Degree tluk ih an ngaih sangmi salu tar theinak dingah nasa tak in an zuam ih,
hlawhtlinnak khal an hmuh. An hlawhtlinnak pawl khal kan Chin santhuanthu
sungih hngilh theih dah lo dingmi nunphung pakhat a si ih, a lomnak ih an cangvaihnak pawl zoh
tik khal ah kan Sansungih hminsintlak mi nunphung pakhat a si. Santhuanthu
sungih kan Pupa pawl ramdaih zalennak pawl ih an rak tel khal ah hruaitu lu bik
le a huaisenbik hlawhtlinnak dinhmun an um theih tik ah hmai a hngal ih, Chin
miphun sinak khal ah rinawknak tampi me a pe.
Tulai kan
Phunsang Tlawngta pawl zoh tik ah, “College Tapung” kan si mai lo maw? Tapung
tampi cu ram zalennak hrangah ramhnuaiah nasa tak in, ti le rawl nei ding nei
lo in le nunthap ngam in an um. An nunnak tiangliam tu khal kutzung kiah cok lo
dingin an um. Ziangruangah tulai tlawngta pawl hi Nu le Pai hnenah siseh, Ram
le Miphun hnenah siseh Tapung kan tuan? Kan nu le pa le kan miphun, kan ram
hminsia dingin Tapung kan tuan rero? Kan dinhmun cio zoh aw sal pei uh!
Nu le Pa neih le
siah, ram le miphun hmin siatertu ding Tapung maw na tuan? Kan ram le kan
miphun hrang nunthap ih hnatuan tu kan pupa pawl ih dungthlun in Tapung na tuan
sawn zoh sal pei uh!
Comments
Post a Comment