Zumtui Nun

Canghril : Mark 8:34-39
Zumtu diktak cun kan mai duhmi tuah thei kan sin nawn lo. (vs- 34-35)
Zumtu diktak cun Lei hlawnthil ai a thlarau hrang a ruat sawn. (Vs- 36-37)
Zumtu diktak cun thuthangtha a zahpi dah lo. (Vs-38-39)
Zumtu diktak cun kan mai duhmi tuahthei kan sin nawn lo vs- 34-35
Himi Cathianghlim sungah kan Bawipa Zisu Khrih ih nunnak kan hmu thei. Ziangvek in hrem le vuak le hmuhsuam ka tuar ding ti a thei aw theh. Hmanseh pai’ duh zawng a thlun a si. Kan mah a duhdawtmi pawl hrang a Pai duhnak a thlun a si. A lei ti sa nak cun a tuar ding hi a thei cia ruangah harsa a ti aw zet.Nang le Kei ziangtin kan nitin nunnak kan hmang. Kan ti sa duhmi, hiarmi kan thinlung diriam in kan tuah maw? Kalati 5:16 ah Paul in kalati pawl ca a kuat mi kan hmu thei. Thla rau thianghlim thawn kan um ahcun kan tisa hiarnak kan diriam ter nawn zik lo a ti. Zumtu ti aw si in kan tisa hiar mi kan tuah tho maw?
Zumtu dik tak cun Lei hlawnthil ai a thlarau hrang a ruat sawn Vs- 36-37
Voitampi mi lai kan sinak in kan bei a dong theu. Cumi pawl cu sumpai, lei hlawn thil, sin le fen a phunphun kan duhmi kan nei thei lo can ah a si. Mi tampi cu kan duhmi kan nei thei lo tuk ah mi lak tlan tla nuam kan ti lo ih, kan khawruahnak cu bei dongnak in a khat ih ka thlarau tha zang cau in Pathian thawn kan hla aw theu. Zumtu U le Nau pawl ziangruangah kan bei a dong? Leitlun ih kan nei mi thil le ri, Hlawn le thil hi Vang Cung ram ah kan keng thei lo ding ti cu Ca thianghlim sung ah kan hmu zo si. VangCung Ram kan thlen tik ih kan co ding mi sawn na ruat dah maw? Rom 10:11 ah Paul in Rom pawl a kuat mi ah zumtu cu a bei a  dong dah lo timi kan hmu thei. Curuangah zumtu dik kan si kan ti awk cun leihlawn thil ruangah bei dogn ding kan si lo. 1The 5:16-18 khal ah zumtu cu lungawi ringring ding kan si thu le thla cam ringring ding kan si thu kan hmu thei. Vang cung ram ih kan ngah ding mi ruat in kan biak kan Pathian hrang kan thei tawk in tuah uh si.
Zumtu diktak cun thuthang tha a zahpi dah lo. Vs-38-39
Zisu in thuthangtha a zahpi tu cu pai sunlawinak ni ah ka zahpi ding a ti. Kan ni tin fehsukso, kan tuah tuan zirnak ah thuthangtha kan zahpi pang maw ? kan zahpi lo kan ti tik ah ziangvek in kan langter ding. Kan Khrihtians nunphung pawl kan ti lang a tul, kan ni tin nunnak ah nundan zia za mawi in leh zoh thimtlak in kan tlang leng a tul. Kan tuahtuan zirnak ah a mah tih zah ih kan um a si le kiangkap pawl in an ni cu khrihtians an si in ti ding ih kan nun ziaza in cawng ding. Curuangah khuinah ram khuinah hmun kan thleng khal ah kan Khrihtians sinak hi zahpi lo ten kan hmangsuak tum pei uh.
Kan Ni tin nunnak ah zumtu kan si langter in leh zumtu kan si ruangih kiangkap pawl ih zohthim tlak ih zumtui nun ih kan nun theinak dingah Pathian in kan zaten hrangah thlasuahnak in pek hram seh.