PAWLKOM (Fellowship) timi hih!!!!

Fellowship timi hi khui in a ra ih, ziangtik in an rak hmangthok? Fellowship timi hi Greek tong ihsin ra mi a si ih “Koinonia” tin an ko. Cumi ih sullam cu Pakhat le pakhat hlawmawknak tican a si. Mirang tong in kan sim a si le Fellowship timi cu “sharing in something with someone” tican a si. Khrihtian mi kan si le veten Pawlkom fellowship timi hi kan neih tengteng tulmi a si. Dungthluntu 2:42-47 sung khal ah Peter ih thusimnak thawn mipi an pungkhawm ih pakhat le pakhat thazang an pek aw, an bawm aw, an neih mi hlawnthil kengkhawm in an hlawmawknak pawl fiangzet in kan hmuthei.

Mi tampi cun ziangruangah Pawlkom kan tul kan ti men thei? Bible Tlawngkai cio kan si vek in Bible lala in simfiang aw sehla! Eph 4:16; Rom 12:5 sungah “Khrih thawn kan pehzom awknak thawng in pumkhat kan si”  Khrihtian ka si tiawpoh cun kan zumnak a beheu lonak le zumnak ih kan cak sinsin theinak dingah Pawlkom awknak kan neih a tul. 

Ziangruangah Pawlkom awk a thupi? Bible thuthawn kan zoh a si le John 1:13 ah Pawlkom awknak kan neihnak cun Pathian cu kan Pa bik le kan lubik a si zia kan langter. 1 Kor 6:20 Pawlkom timi cu Pathian kan sunloih kan thangthantnak a langter. Kol 1:18; II Kor 6:17; Rom 8:17; Mat 23:8 pawl khal ah Pawlkomnak a thupit zi tampi kan hmu thei. 

A sile kan Pawlkom ih tuanvo teh ziang a si kan ti lala men ding? Bible ih in zirh daan ahcun a tlu mi va tungding le a bahril mi kai hruai hi a si. Maha Kandi cun hitin a sim “Sual cu ka hua, asinan misual cu ka hua lo” a ti. Cumi um zia cu tuini Pawlkom sungih u le nau kan zate’n kan theih tul tengteng mi le kan lungput ding mi hrimhrim khi a si. Cuvek lungput kan neih lawngah kan Biak Pathian hmin kan cawngsang thei dingih cutin thla suah dawngtu a fahniang kan si thei ding.

Pawlkom nak ih theih tulmi lungput

1 Pathian tihzah, Tangdornak, Lungrualnak, Zawnruah thiamnak, Teimaknak, adt…. Himi lungput kan neih thei lawngah kan Pawlkom a cak vivo thei ding.

Pawlkom nak tibuai thei pawl

Bulpak palung thuneihnak, Bulpak palung ruahnak, Iksiknak, Hamtamnak adt….. hivek lungput nei pawl hin khuinah ram, khuinah khua khal ah buainak an pe ih mitin kip ih huat an hlawh thung.

Kan Pawlkom umnak  in teh Kan Pawlkom hi ziangtin kum liam mi ah kan rak hmangih a ra lai dingmi can ah teh ziangtin kan hmang tum? A tlun ih sim mipawl thawn kan tuahtuan, kan tlanlen le kan zia pawl ah a rak kalh aw pang maw? Maw! Kan Pawlkom nak hin kan Krihtian nun le Kan Chin nunphung hi a siatsuah lam ha? U Nau a thar in ruatsal cio pei uh! Kan tlaksamnak zawnah thazang thar lasal in le a thiang lo mi kan lungput tan ih ziathar kan nei a si le cutin kan Pathian hmin kan thangthat sunloih thei dingih kan Chin miphun, Kan Chin nunphung mawi ter sintu ah kan cang ding.