THE FIRST OF CHIN LITERATURE CONFERENCE
MEDIA (JOURNALISM)
Timtuahtu : Salai C.lian
Thuhmai hruai
Ahmaisabik
ah hitivek Chin Calai Khawmpi ih mifim, mithiam le rinsan mipawl hmaiah Media sungih
Journalism thusimtheinak inpetu kan Pathian hmin ka thangthat. Calai lam ahhin
cabu ngan zo mi cu ka nei hrih lo nan, a siar lam in karak lut hnelhnonak cu
Thuthangca ca siarnak in a si. Cun miphun pakhat bengvarnak hrang le thansonak
hrangih hriamhrei pakhat a si ve mi, journalist kan tul bik mi le thansonak
hrang karbak pakhat a si tiih ka hmuh fiang ruangah hi lamzin ka hrilnak a si.
Tuitum
ahhin Media timi simfiang tum rero hman nungna simcem theih lo tluk ih kau a si
ruangah Media sungih Journalism le kan miphun dinhmun timi kan ruat tlang sawn
ding. Cumi hrangah ka rawk timlam ve ih, kan thulu le kan hmuitin mi ngai teh
kheng ngah na hen thei kei maw! Media ih
kauhzia, a tlunah simcem theih lo tluk in a kau tin ka tarlang zo nan,
Journalism timi khal cu media vek thotho a si sunnivu ruat khawm hmansehla a
cem thei ding ka zum lo. Hruaitu pawl ih in duhsak mi Journalism cu sunnivu
heng rero hman ningla a cem thei lo ding ruangah keimai thinlung i kuai neh zettu
journalist thu kan theih bancin tawk hailang kan tum ding.
Journalism
ih sullam
Journalsim ih sullam hi relfiah le simfiang a harzet
ih kan Chin tongten kan sim a si le thuthang timi le Cangan dan phundangdang (literary
style) khi a
khihhmuh. Cumi sungah phunthum in thlir a theih. Hmin thawn tarlangnak (Noun)
Thuthangca (newspapers), magzazines, awthannak
thuthang (Broadcasting news on radio) le zuknung thuthang (television) pawl tla
an si.
Pop Journalism
Thuthangca hi a phunphun a um ih, kannih mipi pawl
cun ziangvek journal le thuthang khal bangrep in kan rak ruat theu. Kan Chin
tongih kan neih mi Journal pawl ahcun kan tarlang ding mipawl tawkfang nawn kan
rak hmuh zo dingih hleiah kan siar rero zo ko ding nan ziangvek phun pawl a si
ti cu fianglo tampi kan um ding ti ka zum. a hnuaiih kan tarlang mipawl hi Pop
Journalism tiah an ko. Cupawl tla cu Pursumnak thuthang (the news paper
business), Leitlun thuthang (the news parper word), canamnak(the press), carial
suahnak media (the print media) pawl tla an si.
Tican le sullam bangaw nan tongfang dangdang
(Synonyms Journalism)
Tican le sullam cu bangaw ko nan tongfang dangdang
mi thinlung kaiawk dingin simaw, acozah tih um ruangih tongfang dang hman mi simaw,
thu pakhat zamrangzet ih theihter kan duh mi tuanthu, thuthang nem (features)
pawl cu Synonyms tiih kawh a si.
Journalism
simfiangnak
Journalsim timi hi kan simfiang tum tikah a tlunih
tarlang vekin tongfang pakhat hmangih fumkhawm in, simfiangnak ding karak hawl
rero nan kan tongin ziangvek ciah in kan ko dingih, ziangvek tongkam kan hmang
ding timi hi tuini tiang ka ruahsuak thei lo mi a si. Curuangah Journalism timi
khaikhawmtu dingin kan sim a si le media pakhat carial suah ding a si lo le
mipi vantlang hmuh dingih hailangtu pawl tin kan sim le a sualtuk lem lo ding tin ka
ruat. Media thansonak hrang nasa zet ih hliakhlainak a tuah rerotupawl tla an
si thotho. Cuvek thotho in casuah ding hrangih a remtu, a cekfeltu pawl,
hmailam can ih thil ra thleng dingmi tarlangtu pawl le tui thilcang mi mipi
hnenah thuhla an ei nak ding hrang a
tuahtu pawl tla an si.
Santhuanthu
sungih News (Journalsim)sulhnu thlirsalnak
Leilungtlun
mipi pawl ih Thuthang timi kan rak fianghlan deuh ahcun China ram khawlipi
Pekiing ah thingpar ih ngan mi acozah cun an rak suah dah ih, an thuthang pawl
cu Rom acozah hnentiang a rak thleng tin hliakhlaitu pawl cun an sim. Himi
sanlai khalah a hleice in mipi pawl ih tul mi tlaksam mi pawl cu tarlang a si
ih hleiah Rom khawpi ih Tek ih thlak that mi thutiang an than. Tawkfang kum
1571 hrawngah Italay ram, Venues khawpi ah acozah cun weekly thuthang an run
suah hnelhno ih Gazzetta sumpai pia khat thawn rak zuar a si. Cutin kum 1615
hrawngah Germany pawl cun canamnak cet an tuah suak ih, Germay le Kum 1622
England ram pawl ah kartin suak thuthang an hun nei ve. Kum 1677 hrawng ahcun
England ramlawng siloin ramdang pawl khal ah thuthang an run nei vivo ih, an
thuthang pawl cu lakphak dawr pawl ah an zuar. A siartu pawl khal in an theih
mi le an siar mipawl cu an ret ui-eek men lo ih, an rualpi pawl cu an sim sawng
vivo. A netnak ahcun lakphak dawr cu thuthang ngahnak hmunpi ah a rung cangta.
Kum 1558-1603 hrawng
Elizabeth ih England rampi a rak uk lai ah Thuthangca cu an rak nei zo nan,
zalennak an neih taktak lo ruangah an hlawhtling thei lo. Kum 90 hrawngah
Benjamin Harris khal cun a ti theitawk in a tuah, asinan acozah tlaksamnak a
tarlang ruangah kaihhrem a tong. Asinan kum 5 hnulam cun zalennak an run pe
leh. Harris thawnginn ihsin a ra suah veten American ah avai leh ih lakphak
dawr tuah phah in thuthangca cu thlatin suak a tuahsal. Himi san lai hi
American pawl khal rundamnak an co pek hrawng a si ih, zumtu pawl an hremnak
pawl a suah tikah acozah cun suah an siang lo lala. Asinan a sulhnu cu mino
tampi in an run cawng.
Kum 1704 hrawng Buston khawlipi ah John
Campbell cun thuthangca pakhat a run suahsal. Teimak thlak in an zuar tikah
thuthang siartu pawl khal a nini in an pung vivo. Cutin casiartu an tam
rualrual in thuthangca khal a pung vivo ih, mipi pawl ih tulsam mipawl ziangkim
cu thuthang pawl ihsin an rak thei ih, anmai va hliakhlai tul nawn loin umhmun
in ziangkim an rak thei thei.
Cun John Cambell ih
thuthangca cu American ram ah kum 15 hrawng a fehpi hnu, kum 1719 hrawngah
William Brooker timi pa cun The Boston Gazette timi thuthangca a suah thok ve.
Thuthangca hmunhnih in a um thlang tikah khat le khat cu zoih thuthang ca sawn
a cak ding timi zuamawknak cun an thinlung ah nasa zetin hna a `uan. Cutikah
thuthang `ha`ha an neih theinak dingah tin, mipi pawl in ziangmi thuthang kan
ngan asile kan thuthangca an siar paih sawn ding timi ruahsannak thawn acozah
lamih harsatnak thuthup pawl khal an cawih, phorhsuak `heu. Caan tawkfang hnu
cun acozah lam khal an beng a var vivo ih cui thuthangca cu an kaihrem leh.
Karlak harsatnak le buainak phunphun an thleng.
Kum 1775 American
pawl, British sal sung ihsin zalennak lamzin zawh in an sual lai ahhin American
rampum ah thuthangca 37 a rak um zo. Cumi lak ihsin 23 cu Tapung pawl ih suahmi
a si ih, 7 cu acozah lamih neihmi, cun 7 lam cu thuthang maimai suahtu pawl tla
an si. American pawl zalennak an sualsuak hnu kum 1776 hrawngah cun dindaan
hrampi pawl an rem rero thok. Thuthang latu pawl cun ram hruaitu `henkhat an
thuthangca thawn fakselnak a phunphun in an tuah rero. ~henkhat mipi pawl ih an
tuarnak a phunphun pawl khal cu an thuthang ca sungah an taarlang. An thuthang
ca pawl cun mipi thinlung sungah hna nasa takih a `uan tikah thuthang ca pawl
cu menmen sawling ih ngainep a theih nawn lo ih, thuthangca ih `uanvo neitu
`henkhat pawl tla cu ram hruaitu tiangah an suak. Tikcu caan tawkfang nawn a
liam hnu cun thuthangca pawl cu domi Party ah an cang ih kilkip in dotu an nei
thlang. Harsatnak phunphun rak pahtlangtu an si tikah an tuah`uannak zalam pawl
ah hlawhtlinnak an hmu vivo. Cutin ram uktu mitampi pawl khalin thuthang ca ih
`hathnem zia, a `hatnak a phunphun pawl an run hmusuak vivo. Cutin Thuthang ca
(News) timi hi Biaknak lam in siseh, Ramkhelnak lam in siseh, kaihruaiawknak
lam in siseh hriamhrei `habik a si tin mifim pawl in an run hmusuak .
Thuthang
phunziat a um?
Thuthang
phunziat a um tiih kan vun ti tik ah kan Chinmi mitampi ruahnak ahcun phun dangdang
a um ding tiih ruahnak neitu kan um khal le kan tam lemlo ding. Thuthang timi
sungah phun hnih a um. Cumipawl cu Thuthang Hak (Hard News) le Thuthang Nem
(Soft News) pawl tla an si.
Thuthang
Hak (Hard News)
Ziangvek
thuthang kan ngan khal a si le a hmaisabik ih kan ruah a tul mi cu thuhmaihruai
(catluan hmaisabik) le ngandan (Lead & body) hi kan ruahthat a tul zet.
Catluan hmaisabik ih a thupit le a tul hleicenak cu Thuthang Hak pawl ah a si.
Ziangah tile Thuthang Hak pawl cu atu rori ih mipi pawl lo theih lo ih thei
tengteng dingih kan than mipawl a si. Tahthimnak ah Linghnin a ra thelng ding,
Ti a lik ding adt..hi can ahhin Hard News thuthang ngan dan pawl hman a si.
Hard News pawl kan ngan tik ih kan theih tul bik mi le a thupi hleice mi cu mipi
pawl in thuthang an siar tikah catluan hmaisabik an siar ihsin an thinlung
sungah nasa zet in hna a tuan ih, a hnuailam ca pawl tiang siar theh duhnak
tiang thinlung neihter ding khi a si. Ziangah tile poi mawh taktak pawl thannak
ih hman a si tik ah a hnuailam an siar paih nawn lo a si le an hrangah
harsatnak a phunphun a thleng thei. Curuangah Thuthang Hak pawl kan ngan a si
le a hmaisabik ah ziangmi thupi kan tuah ding, a catluan hmaisabik ah ziangvek in
kan ngan a si le mipi kan neh ding timi nasa zet ih kan ruah a tul.
Thuthang Nem (Soft-News or Feature)
Thuthang
Nem timi cu zamrangzet le a tulzet ih mipi theihter tul mi thuthang a si lo tik
ah veikhat an siarnak ihsin ziangkim an theih theh ding hi a tul ciamco lo.
Ziangah tile cui thuthang pawl cu an man tikah nuamnai ten khal an siar theisal
ruangah a si. Asinan hi thuthang pawl ahcun thuhla cangmi ziangkim cipciar zet
ih tarlang a tul ve thung. Cumi pawl kimcangzet ih a tarlang theinak ding ahcun
Who, What, Where, When, Why, How ti ih kihhmuh mi pawl famkim zetin a kim ding
a si. Thuthang latu cun thilziangkim cangmi mipi pawl ih thusuhnak a let theh
theinak ding ahcun a tlunih tarlang mipawl hi kimcang zet ih a theih/neih a
tul. Thuthanglatu dinhmun ih tonteh a nei zotu mitampi pawl ih kan thuthang in
hmual a nei maw? Kimcang mi a si taktak maw timi cu an thuthang an kuat hlanah
W/H thusuhnak paruk thawn khaikhawmnak an tuah ta ringring.
Culawng
a si hrih lo Thuthang latu asilo le thuthang a ngantu pakhat cun W/H tlunah “So
What” Ziangtin a rung cang bet timi mipi pawl anmah le anmah thusuhnak tuah aw
ih, an buaihnukhno ding ko in a thu cu a thawt ih mipi pawl ih an ei a tul.
Thuthang latu asilo le cangantu pakhat cun a cangan mi par ah mipi pawl ih
thusuhnak an tuah aw thei lo a si ahcun cui a ca ngan mi cu a hlawhtling lo
tinak a si. Cumi pawl hailang thluh ding cun cangantu pawl in kan ngan mi thuhnu
le thuhma thawn pehpar aw mi thuhla(context) le a dunglam ih um mi thu(background )pawl
kimcang zet ih mipi pawl ih an fiangnak
ding kan coihsuaksak a tul.
Journalist
ih tuanvo
Journalist
timi cu leitlun khaw kilkip ih um mi ramhmuahhmuah ih hnatuan lakah a thupi zet
mi hnatuan pakhat a si ve. Asinan Journalist pawl cu a ram le a ukawknak zir in
an danglam cio. Ram tampi ahcun an thuthang suahnak an carialnak pawl cu acozah
ih neih mi le bulpak neih mi a um. Ziangvek a va si khal le Journalist pakhat
ih a tuanvo cu a kiangkap a mipi pawl ih dinhmun phorhsuaktu dingah le lamzin
dik ih an fehsuak theinak ding tiang lamzin kihhmuh ding cu a tuanvo tumpi a
si. A khaikhawm ih kan sim a si le mipi pawl bengvar dingih tuah le lamzin dik
khihhmuh ding a si. Asinan Journalist pawl cun hnatuan tampi an tuansuak
theinak ding “an thazang pi cu mipi an si. Cuvek thotho in mipi pawl ih thazang khal
journalist pawl”an si.
Asile
Journalist pakhat ih hnatuan cu ziangmibik a si ding? Jousnalist pakhat ih
tuanvo cu thudik thansuak, acozah le mipi karlak pehtlaihnak tuah sak, mipi
pawl hnenih thansonak thuthang phunphun than, mipi pawl fimthiamnak pek, mipi
pawl nuamawkter le mipi pawl ih pursumnak kilhimsak pawl tla an si. Ziangvek
thuthang kan va ngan khal a si le Journalist pakhat cun bangrannak, zatrepnak,
fumfenak le tuanvo laknak lo theih lo ih a tuah dingmi a si. Tahthimnak ah
ramkhelnak lektu Party pawl cun hrilawknak hrang thu an sim tikah Journalist
pakhat cun a thlun tengteng tul mi a si. Asinan khai a thlun mi Party cu
langsar deuh le, tannak langih a tarlang a si ahcun cui journalist cu a ti sual
tinak si. Cuvek thotho in sukso fehnak hrang sumpai thawn simaw, thliri thawn
simaw an kawh tik khalah thuhla a ngan tikah a dik ih ngan suak tu a si a tul.
Editor
tuanvo
Kan
Chinmi cabu le mitampi ih kan thlun theu ringring mi Editor zofeltu tiih kan
lek theu hi a thazet, harsazet ih raklet mi tla a si ding nan, Journalist lam
ih thlir tik ah tha ka ti ciah lo. Ziangruangah tile kannih Chinmi pawl ih kan
rak theih dan tam sawn ah Editor zohfeltu timi ih hnatuan cu kan cangan mi
zohfel dingfang tiih a ruat tu kan zaten
kan si lo nan mitam sawn cun kan ruat. Khatlam ih ruah tik ah mawhthluk ding
ciamco khal a si lem lo. Ziangah tile mawhthluk ding khop ngai in harsatnak kan
tong lo ih, cunah a si ding ka zum. A taktak ih kan sim a si le Sa, Ne, Zin
timi sungah calai lam tawkfang nawn a lut in ka thei. Harsatnak kan tongtaktak
sehla ziangkim tuanvo a latu ding cu Editor hi an si. Editor in huaisenzet in hna a tuan thei
a si le a kuthnuai journalist khal in huaizet in a tuan ngam ding. Kan Calai
pawl a thanso ding cun Editor pawl nan parah tampi a thum aw. Casuah le hlon
theinak cu nan kut sungah a um ringirng.
Mipi
le Journalsit
Mipi
le Journalist tin thupi ka tarlang tik ah nan mang a bang tla si men thei. Ka
hmuitin mi sawn cu mipi pawl in Journalist pawl ih kan thazang an sizia le
Journalist pawl ih zalennak malte tal in theihpi thei cila ti hi duhthusam a
si. Mipi tampi cun ziangkim tarlang mipawl hi mualpho awk ternak ah kan ruat. U
Kyaw Zi Yah (ဦးေက်ာ္ေဇယ်)
cun, “Mi pakhat mualphoternak timi cu theihtheih fahran ih awkam hman le cangan
pawl khi a si” a ti. Himi thuthawn a tlunah Journalist pakhat ih tuanvo
bangrannak thawn a khaikhawm a tul.
Burma News International ih Media kutkaih (Media Ethic) cabu sungah mipakhat ih
sualnak cu a malbik mi pahnih ih thathnemnak anrak nei a si ahcun ngan suah a
theih tin a tarlang. Asinan hivek dinhmun taktak kan thlen tik ahcun fumfe zet
ih tannak(evidence) kan neih ve a tul. Hivek thotho in Chin Media Network ih
daan a neih mi cahmai 5 (11) nak ahcun acozah lam thawn buainak a nei ih thuhla
felfai hrih lo mi cu zo deuh a mawh ih, zo deuh a dik ti ngan a siang lo. Cumi
ih sullam cu buainak mi a pek thei ruangah ngan hnak in, ngan lo lam thazang mi
a pe sawn ti a fiang thei. Hi zawnte hi mipi pawl ih kan theih cio ding ka
beisei.
Tlangkhawmnak
Atlunah
Journalsim ih mizia, a sullam, simfiangnak pawl kan tuah rero nan, kan beng
deng tiang cu a lut lo men thei. Pupa pawl ih hnavihnak an rak tivek hrawng khi
a si ding ka zum. Kan Chinmi dinhmun ah Journal suah hi a harsazet ih rei dam
khal a har. Atlunah santhuanthu ih Thuthang an suah lai ih an tonteh mi zohthim
tikah tui kan dinhmun cu kan zia um tuk kan tang thei tuk lai. Cuvek ih a
thangso mi kan si theinak dingah Mipi le Journalist kan tangtlang thiam a tul.
Khatlam ah mipi pawl khalin Journalist pawl ih ramri kan theih thiampi a tul. Editor
pawl khal in ziangtluk in kan tuanvo a tum ih, ziangvek dinhmun ah ka um ti a
theih a tul. Cutin maih tuanvo thei in le mipi pawl ih thinlung laih dengkek
thei dingih kan tuan a si le mipi pawl
casiarnak lamzin ah paihnak le phurnak
nei in an ei thaw dingih kan ram,
kan miphun khal tu hnakin kan thangso vivo ding.
Sirhsan mipawl
Harcup
2009,
p. 3.
"What
is journalism?".americanpressinstitute.org.
Retrieved 28 July 2014.
“Basic
Story Structure” Prporting and Writing News A Basic Handbook
By
: Peter Eng and Jeff Hodson. The Indochina Media Memorial Foundation 2001
Media
lawkah hma a chi chiah me su hlin (မီဒီယာေလာကေျခခ်မည္ဆုိလွွ်င္) , p. 21
Chin
Midia Network Media Kutkaih, 2014, cahmai 5
သတင္းမီဒီယာက်င့္၀တ္
(ျမန္မာႏုိင္ငံစာနယ္ဇင္းေကာင္စီ (ယာယီ)) ၂၀၁၄၊ ေမလ (၃) ရက္
Comments
Post a Comment