NI A SA! NI A SA! NIKHAT HNU NIKHAT A SA SINSIN

Chin mipawl kan santhuanthu zoh le hliakhlai rero tik ah mi ti buai hmang le venghnen pawl zoh rem lo khop ih tlangleng kan um lo. Kan mahten kan um ih, kan mahten kan nuamawk. Hlanhlai ahcun an thinheng hmanah zuupi an rak bengh ih, cutin remnak  zuu in phah cun an thu buai hla buai an rak rel rem. Cumi ih sullam cu mai sung thu ah buainak um khal sehla ka buainak hi kan kiangkap pawl a va hnok sak pang ding timi lungput kau zet neitu kan si tinak a si. Cun serh le sang khal tampi an rak nei ih, cumi lak ih ka tarlang duh mi pakhat cu ramri thu ah a si. Pupa pawl cun ramri nor hi an rak duh lo zet ih, thihnak ti rori ih rak serh tu kan si. Cumi um zia cu mai ta lo ka ta tiih va lon le mithil va lak tivek hi a duh ih rak duh lo mitlaitluang lungput, thinlung kau zet neitu miphun kan si.

Kum 1914 hrawng ahcun tui kan umnak lairawn hi Tuupi thawn rak khat mi ram ngaw a si. Cumi lai ah Pu Lian Hmung le Inn sangdang 8 pawl cun Chin miphun pawl umnak ding tin December 24 ah khua an rak sat. Tu ahcun Kum 100 lenglo a si thlang. An nih pawl cun thlanri put thluangtlong rori in suk le so ah ram an veh, cutin an ram vehnak pawl ih neitu nei lo ram thianghlim cu hril in khua an rak toh. Tuini ih thlicang mipawl hi an rauthla pawl lungsungah ziangtin um pei maw? An rauthla pawl an lungawi thei pei maw? Democracy hruaiawknak lam kan pan rero kan ti lai ah kan tlunih ni cun kan pupa pawl ih harsazet ih an rak tuansuah mi cu a ziam ral men ding maw? A sung um mipawl siannak tel lo ih an tuah mi hi, zoh liam a va har tak em! Tongphila thlanmual kan ti nan kalaymyo Christian mi hmuahhmuah ih kan hman mi le kan um khawm nak a si. Kan Chin miphun pawl hi kan cung ninu cun in va hmu savuak ve!

Hlanhlai Burma zalennak a ngah hnu pek hrawng ahcun Burma ralkap Battalion pawl ah kan Chin ralkap pawl cu mihuaisen le rinsan mi an rak si. Cumi can khal ah kan Chin mi pawl cun an lungput ah ram le miphun hrang ti rori thihnai thawn an rak tuan. An thihnai put ih an tuannak pawl cu kan nih an tesinfa pawl harsatnak petu ah a cang lan ta ding maw? Ziangruangah Chin mipawl  par ah ni a sa hleice cuang? Zumtu kan si ruangah kan tang dor ringring men ding maw? Zumtu pawl ih ngaithiamnak thawn mi va neh aw tiih kan zirh awk mipawl a va thlun har tak em!

Pathian sersiam mi kan cung ninu kan dung June 4 ahcun leitlun ih thleng dah lo mi mangza in zinglam nazi 3 a suak. Ni kiangih um tu Arsi pawl thusuhnak tuah tik ah an nih pawl cun kan ni cu Ni kiltu fang kan si. Ziangruangah zinglam nazi 3 a suak ti kan thei ve lo an ti. Asinan kan dung lam Kum 2014 ihsin ni cu tlak a tum theu. Veitam tak a zuam rero ko nan kiangkap ih um leitlun mipi pawl cun ni cu thlak ding an siang lo. Na tlak ahcun leitlun mipi pawl ziangtin kan nung nawn ding tiih an khamnak ruangah cutin tla lo in a um. 

Kan pupa rauthla pawl umnak khawpi cu ninu ih theihpinak kum 1970 ah an rak nei zo. Cuihleiah bulpak hmin lawng siloin leitlun mipi pawl zate ta sinak thawn rak tuah mi a si. Ninu cu a rak tlak tum ringring tik ah leitlun mipi pawl cun an rak kham ih, cuihleiah Ni thlun tu pawl cun kan bawi pawl ih siannak a ra thlen hlan lo cu leitlun ah zianghman kan tuah lo dingih, zianghman kan thleng ter fawn lo ding tiah thukamnak tiang a rak pe. 

Kan pupa cun mipa thuthin kel lo titiang hman an rak ti. Nitlak awh lo thukamnak teh cu ziangvek thukamnak a si ding. Kan Chin miphun pawl cu kan thukam mi ah kan rin um ih, kan tongvek in kan tuah theu. Democracy lamzin kan pan rero kan ti lai ah ziangruangah Ni cu a sa sinsin. Leitlun mipi hrangih ni eng mawi petu ding ni cu ziangruangah thimnak a pe. kan cung ninu nitin a sa a sa a sat sin sin hi leitlun mipi in daiten hnaset kan tun men thei pei maw?