CARIAL ZEMSUAHNAK & MIPAKHAT MUALPHOTERNAK

Carial zemsuahnak le Mipakhat mualpho ternak kan ti tik ah, mipakhat ih canvo simfiang duhnak a si. Media pakhat cun cazual si maw, Journal si maw, Magazine si maw a suah tik ah mipakhat ih sinak, a thu hla cu mualpho dingih thu hla kan ngan mi khi sim duhnak a si. Mipakhat ih canvo hi kan ruah tik ah thlirri pakhat vek men a silo ih, minung pakhat ih kan sinak cu leitlung ziang hmuahhmuah hnak ih man khung sawn mi a si. Kan thil le ri cu cem ral hmanseh, kan hmin le kan sinak cu cem thei a si lo ih, kan thih hnu hmanah cui kan thu hla cu leilungpi a um sung a um ringring. Curuangah Mipakhat ih sinak mualpho ter dingih carial suah hi daan sung khal a kalh ih, mipakhat ih canvo ti buai tu thu dik lo mi dik vek ih carial suah mi khi a si.

A tlunih tarlang mipawl hi carial suah mi thawn siseh, a kaikawh mi zuk thawn siseh, mi theih thiam dingih tlanlengnak pawl khal ih tuah thei mi a si. A dik lo mi thu dik vek ih kan tuah dik ah acozah khal in a pompi lo ih nasa zet ih hremnak pek theinak khal a si. Sualtuahnak thawn a peh par aw mi daanhrampi 499 sungih simfiangnak daanhrampi 500 sung ahcun hitin simfiangnak a tuah.

1. Thudik lo, thu lenglawng a si ding.
2. Ca ih ngan suak mi a si ding.
3. Mipakhat cu a mualpho ter ding.
4. Carial suah theh zo mi a si ding.

Mipakhat cun kan tuah lo mi le kan sinak zawng a si lo mi tiih fumfe zet ih kan theihfel mi thuhla cu Media pakhat in a suah tik ah, cui a suah mi cu iksiknak le zomtaihnak thawn tuah mi a si tiah kan pom thei ih, cui Media cu acozah hnen khal ah hek theih mi a si.

Mualphoternak a suah ter thei mi calai siseh, carial thawn si she tuah thei mi a si. Cuti ih a silo hmanah zuk thawn si maw, um tu dan in si maw tuah theih mi a si. Simfiangnak cu a felfai ih a hmun mi umtu dan a si ding. Mipakhat sawh duhnak ruangih huat mipakhat theih thiam dingih zuk lem tivek ih hman khal acozah ih daan lengah a um ih hek theih a si thotho.
Mipakhat mualpho ter timi cu mihuat dingih tuah, mi upat tlak lo dingih tuah a silo le a hnatuan si maw, a thiam mi si maw, a ei hawlnak si maw, a pursumnak si maw, a sumdawnnak pawl si maw midang pawl ih tih dingin le midang pawl ih kom hraphri dingih va tuah pawl khi a si.

Calai suahnak zung pakhatkhat ihsin mipakhat cu zumtlak lo a si tiin siseh, minu pakhat cu a tha lo mi dinhmun ihsin puitling mi a si tiih rialsuah mipawl cu minung canvo siahsuah tu tiih pom a si. Cui dik lo zet ih simfiangnak pawl cu acozah dindaan hrampi khal in pompi lo lawlaw.
Mipakhat mualpho dingih simfiangnak cun a naa sawn tu cu a khihhmuh ringring. Curuangah a tuartu sawn hnenah direct in siseh, a hel zawngih siseh a tuar tui’ hmin cu ngan theh a tul kher lo. A tuartu ih hmin cu a hmin tawi in si maw, phuahcop hmin in si maw a tuah khal a si le a sualtu cun a mah le mah cu a rak theithiam aw dingih cutin a ngai dan khal a hahdam deuh sawn ding.

Cuvek ih kan tuah tik ah casiar tu naivai pawl cun zo a sim duh timi cu an rak fiang theh mai dingih, a sualtu ih rual le pi pawl ih nangmah an lo relduhnak a si lo maw tiih an ti tik khal ah ka si ngai pei maw aw tiin a ruahbuai dingih, thu hla hnok ding mipawl cu hnok ter lo in a um ding. Curuangah ca kan ngan tik khal ah tongkam fimkhur zet ih kan ngan a tul, a sual tupawl cun ziangvek in kan ngan timi an rak thlir dingih tongkam mawi lo tuktuk a si lonak tiang kan ngan a si ahcun acozah hnenah hek theih a si. Asinan kan hek ding tik khal ah a si lonak tiang a porhsuak mipawl cu fumfe zet in Evident a nei dingih thuthennak thlen tik khal ah a relfel theh thei fawn ding.

Mipakhat mualpho ter dingih thuhla a um tik ah cui calai/thuthang suahtu pawl cun tuanvo tumpi a nei. (Hminsin : Calai/Thuthang suahtu ih khihhmuh mi cu Zohfeltu/Editor tinak a si) Ziangruangah ziangvek thuthang/calai a suah ding ti cu a zohfel theh hnu lawngih suah mi a si tik ah tuanvo tul mi hmuahhmuah a phur theh ding. Cui dinhmun a thlen tik ah ti hrimnak in kan ngan si maw, theih lo ruangih kan ngam mi si maw tiih kan rel khalah tuanvo a la tengteng ding mi a si.

Carial suahnak um lo ih simfiangnak men cun mipakhat ih canvo a siatsuah thei lo. Mualphoh awk ternak calai cu a tuartu hnenih a thleng cih a si ahcun acozah daan cun cui ca cu a suah hrih lo mi a si tiah a pom. Ziangruangah tile mualphoh awknak hrang midang hnenih a thlen lo ruangah a si.

Mipakhat mualphoternak calai/Thuthangca cu suah dingin cangantu/reporter cun Media pakhat hnenah a va up ih cui mi cu mualphoh awknak tiih a tuartu ih acozah hnenih kan hek ding a sile fumfe zet ih hliakhlainak neih felta a tha. Ziangruah ah tile Media pakhat a silole Calai zung pakhat ih a suah bet mi ca/thuthang cu a veihnihnak rialsuah mi a si zo. Curuangah cuvek buainak dinhmun kan thleng tik ah tuanvoneitu cu cangantu/thuthang latu cun tuanvo a nein awn lo ih, tuanvo phur theh tu ding cu Calai zung/Media ih tuanvoneitu bik le carial suah tu sawn khi a si. Curuangah casiar tu le a rak zoh tupawl hnen ihsin hek awknak a um tik ih tuanvoneitu ding bik cu Editor le carial suahnak sawn khi a si. Hitawk zawnah kan Chin mi tampi cun kan hlo theu ih, Reporter pakhat lawngih phur dingah kan ruat theu. A taktak ahcun Reporter cun thuthang a ngah mi cu ziangvek a si khal le up ding cu a hna, cun a suah le suah lo lam ahcun Editor hi thu neitu bik ah a cang. Cutik ah mipakhat mualphoh awknak kan timi ih phur neitu bik cu Editor le Carial suahnak (Publiscation) lam sawn khi a si.

Mipakhat mualphohawknak ih simfiangnak bik cu calai/thuthang zemdarhnak ih sin a si ti cu kan fiang theh ding a zum um. Cui zemdarnak cu heknak khal veitampi a rak um thei. Asinan
1. Carial suah mi cun mipakhat mualphoh awknak a um thu theih lo awk ternak
2. Cui ti sualnak cu mai thiam lo nak a si lo thu
3. Mipakhat mualphohternak cu a tel thei thu, cuvek ih buainak suah tham dingih a zum lo thu pawl felfai zet ih a rel fiang a si ahcun cui buainak ihsin a suak thei ding.
Hivek dinhmun thlen tik ah cangantu/casuahtu/zohfeltu pawl cun a tlunih tarlang mipawl thawn khaikhawmnak a tuah tengteng dingmi a si.